काठमाडौं / आगामी फागुन १८ गतेबाट प्रदर्शनमा आउने चलचित्र ‘अगस्त्य : च्याप्टर १’को टिजर सार्वजनिक गरिएको छ । आइतबार राजधानीको एक हलमा आयोजित कार्यक्रमका बीच निर्माण टिमले चलचित्रको अफिसियल टिजर रिलिज गरेको हो ।
चलचित्रको सार्वजनिक १ मिले ५६ सेकेण्ड लामा टिजरमा महत्वपूर्ण दृश्यलाई समेटेर तयार पारिएको छ । चलचित्रको टिजर रिलिज कार्यक्रममा निर्देशक सौरभ चौधरी, अभिनेता सौगात मल्ल, नाजिर हुसेन, प्रमोद अग्रहरी, मलिका महत लगायत उपस्थित थिए ।
चलचित्रको टिजरमा अभिनेता सौगात मल्लको बहुचरित्रकरण देख्न सकिन्छ । उनको प्रेमीदेखि ग्याङस्टर हुँदै मानसिक सन्तुलन गुमाएर सडकसम्मको चरित्र चित्रण टिजरमा देख्न सकिन्छ । बदलाको कथामा आधारित चलचित्रमा मलिकालाई सौगातकी प्रेमिकाको भूमिकामा देखाइएको छ ।
सौगातले आफूले मन पराएकी युवतीलाई अपहरणबाट मुक्त गर्न गर्ने लडाइँको कथा चलचित्रमा प्रस्तुत छ । सौगात सबै चरित्रमा ‘पर्फेक्ट’ देखिएका छन् । उनको मानसिक सन्तुलन गुमाएको अवतारले पनि दर्शकमाझ कौतुहल्ता पैदा गर्ने देखिन्छ । टिजरमा नाजिरलाई एक्सन अवतारमा देख्न सकिन्छ ।
चलचित्रमा सौगात, नाजिर र मलिकाका अलवा निश्चल बस्नेत, प्रमोद अग्रहरी, बेन बस्नेत, विजय बराल, रवीन्द्र झा, शिशिर बाङ्देल, सिम्रन खड्का, प्रकाश दाहाल, प्रदीप ढकाल, गजेन्द्र त्रिपाठी, सचिन चन्द्र लगायतका कलाकारको अभिनय छ ।
डार्क हर्स इन्टरटेनमेन्ट र सेभेन सिज इन्टरटेनमेन्टको प्रस्तुतिमा निर्माण भएको चलचित्रका लेखक तथा निर्देशक सौरभ चौधरीले टिजर बनाउन मिहिनेत गरेका छन् । प्रकाश मल्ल, अनिष तामाङ र विनोद पौडेलको चलचित्रमा लगानी छ । विश्व गौचन र अभिषेक चौधरी कार्यकारी निर्माता रहेको चलचित्रको टिजरलाई पूर्ण रुपमा व्यावसायिक शैलीमा तयार पारिएको छ ।