अमेरिका देखि नेपाली गीत संगीत क्षत्रमा “झरी” लिएर आउदै रचनाकार तथा गायक सुवास लाखे

मनोरंजनसंसार डटकम
नेपाली गीत संगीतको चर्चा परिचर्चा यति बेला गर्ने हो भने धेरै कुराको परिवर्तन भएको अवस्था छ । पहिलेको तुलनामा नेपाली गीत संगीतको स्तर देखि बजार व्यवस्थापन पनि नेपालमा र नेपाल बाहिर राम्रो भईसकेको छ । यस हिसाबले पनि धेरैलाई यति बेला नेपाली गीत संगीतले आकर्षित गरेको छ । यस हिसाबले नया उदयमान कलाकारहरुको आगमन नेपाली गीत संगीतमा तीव्र पनि हुदैछ । तर अहिले पहिलेको समयको अनुसारले नया आउने कलाकारहरुमा पनि धेरै कुराको मिश्रण भएको पाइएको छ । गीत संगीतको बदलिदो परिवेश संगै नया कलाकारहरुको आगमन धेरै नै भयो र हुदै पनि छ । रहरमा आउने नया कलाकारहरुको संख्या त झनै धेरै नै छ । तर रहरको साथमा ज्ञान र अनुभव बटुलेर आउने कलाकारहरुको भने छुट्टै गन्ती रहेको छ । त्यहि गन्ती भित्र पार्न सफल एक नाम हो सुवास लाखे । उनि बहुमुखी प्रतिभाको धनि व्यक्ति हुन् । उनलाई हामी २ किसिमको उपाधि दिन सक्छौ किन भने उनि कुशल रचनाकारको साथमा गायक पनि हुन् ।

उनको नेपाली गीत संगीतको यात्रा धेरै लामो रहेको छ । उनको बारेमा अलिकति इतिहास पल्टाउदै गर्दा उनको परिश्रम धेरै नै देखिन्छ । सानै देखिको नेपाली गीत संगीतको लगाव र इच्छाले उनलाई धेरै अगाडी सम्मको बाटो पनि देखायो । उनको रहर हुदा समेत उनले केहि समय लिए किन भने उनले धेरै कुराको अनुभव र ज्ञान लिन चाहन्थे । त्यहि अनुरुप उनले अभ्यास गर्दै धेरै कुराको अनुभव नेपाली गीत संगीतबाट बटुलेर साथै यस क्षत्रलाई नजिक देखि नियालेर अगाडी बढ्ने प्रयास गरे । आज उनले आफ्नो लामो समयको त्यो इच्छा र लगावलाई सहि मार्ग दर्शन दिएका छन् । उनको अब चाडै नै नया एल्बम बाहिर आउने तयारीमा रहेको छ । “झरी” नामक एल्बम उनको नेपाली गीत संगीतमा डेब्यु एल्बम हुनेछ । यहि एल्बम देखि नै उनले नेपाली गीत संगीतमा पहिलो पाईला समेत राख्ने तयारी गरिरहेका छन् । उनको यस एल्बममा ६ वटा गीत समावेश रहेको छ । उनको एकल शब्द रचना र स्वरमा तयार भएको गीतमा मनोरथ कालिकोटे , डम्बर खापुङ सुब्बा र मणि कुमार कालिकोटेको संगीत समावेश रहेको छ । उनको यस एल्बम भित्रको गीतहरुको अरेन्ज गर्ने काम भने टेकेन्द्र याक्सोले गरेका छन् । उनको यस एल्बममा रोमान्चक गीत संगै इमोसनल आधुनिक गीतहरुको समायोजन रहेको छ ।

आफ्नो एल्बमको बारेमा बोल्दै उनले आफु नया भएर पहिलो पटक नेपाली गीत संगीतमा अगाडी बढेको र पहिलो भए पनि धेरै कुराको मध्य नजर गरेर दर्शकहरुको चाहनालाई आफ्नो प्रस्तुतिले पुरा गर्ने प्रयास आफुले सक्दो गरेको उनको भनाई रहेको छ । उनि यति बेला अमेरिकाको बसोबासमा रहेका छन् तर उनको मन भने नेपालमा नै घुमिरहेको छ । विदेशको ब्यस्त जीवन संगै अगाडी बढिरहेका उनले नेपाली गीत संगीतलाई भने समयको कमि हुन दिएका छैनन् । उनले आफ्नो आमा मेनुका दार्जी देखि धेरै कुरा सिकेको बताएका छन् । एक हिसाबले उनलाई उनको ठुलो साथ मिलेको र यस क्षत्र प्रति उत्सुक गराउनुमा पनि उहाको नै ठुलो हात रहेको उनले उल्लेख गरेका छन् । यस्तै उनले आफुलाई आफ्नो सांगीतिक यात्रामा साथ दिनु हुने विकास लाखे र सबिता मोहरालाई धेरै नै धन्यवाद समेत दिएका छन् । यस्तै आफुलाई सहि मार्ग दर्शन गर्ने र सधैब हौसला र साथ समेत दिने मनोरथ कालिकोटे र डम्बर खापुङ सुब्बा ज्युलाई समेत उनले हृदय देखि नै सम्झदै उहाहरु प्रति आभार प्रकट गरेका छन् ।

नव कलाकार नै भए पनि उनले नेपाली गीत संगीतमा भने बिदेशमा रहेर धेरै नै कुरा गरेका छन् । नेपाली कला संस्कृति र गीत संगीतलाई बिदेशमा समेत स्थापित गराउनु पर्छ भन्ने मान्यता उनले राखेका छन् । यस्तै उनले त्यहाँ रहेका युवा पुस्तामा समेत नेपाली गीत संगीतको बारेमा धेरै कुराको जानकारी दिदै आइरहेका छन् । त्यहाँ आयोजना हुने अधिकांश नेपाली सांस्कृतिक कार्यक्रमहरुमा उनको उल्लेखनीय उपस्थिति रहेको हुन्छ । नेपाली गीत संगीत र कला संस्कृतिलाई सधैब जगेर्ना गर्नु पर्छ र अन्तराष्ट्रिय स्तरमा नै यसको विस्तार हुनु पर्छ भन्दै गहकिलो संदेश सबैमा प्रवाह उनले गरिरहेका छन् । यस्तै उनले अब आगामी दिनहरुमा अझै राम्रो राम्रो प्रस्तुति लिएर आउने र आफ्नो यस पहिलो एल्बमलाई सबैले हेरेर सुनेर आफ्नो प्रतिक्रिया राखिदिनुहुन सबै नेपाली दर्शक श्रोता माझमा उनले बिन्ति बिसाएका छन् । यस्तै उनले दर्शक श्रोताहरुको साथ र मायाले नै आफु अगाडी बढ्ने हुनाले सबै देखि माया सल्लहा सुझाब र हौसलाको लागि समेत आग्रह गरे । यस्तै उनले देशमा तथा बिदेशमा रहनु भएका सम्पूर्ण नेपालीहरुलाई सधैब आफ्नो भाषा संस्कृति र कला साहित्यको सम्मान गर्दै यसलाई माया गर्दै आफ्नो तर्फ देखि यसको विकास र प्रवर्धनको लागि प्रयास गर्नुहुन हृदय देखि नै हार्दिक अनुरोध समेत गरेका छन् ।