काठमाडौं / महाशिवरात्रीको अवसर पारेर आगामी फागुन २५ गतेबाट प्रदर्शनको तयारीमा रहेको मल्टीस्टारर चलचित्र ‘रङ्गेली’को पहिलो गीत ‘हातैले उघाएर’ सार्वजनिक गरिएको छ । अर्जुन सुवेदीको शब्द, हर्कुलस बस्नेतको संगीत तथा निशान भट्टराई र लिला गजमेरको युगल स्वर रहेको छ ।
गीतको भिडियोमा अभिनेत्री शिल्पा मास्के र मोडल प्रिन्स विश्वकर्मा फिचर्ड छन् । गीतमा शिल्पालाई बोल्ड अवतारमा प्रस्तुत गरिएको छ । शिशिर खातीको कोरियोग्राफी रहेको गीतको भिडियोमा चलचित्रका मुख्य कलाकारहरुको चरित्रचित्रण गर्दै केही प्रेमिल र द्वन्द्वात्मक दृश्य पनि समावेश छ, जसले कथावस्तुबारे महत्त्वपूर्ण खुलासा गर्छ ।
शिल्पा र प्रिन्स चलचित्रको गीतमा मात्र देखिनेछन् । ‘हातैले उघाएर’ गीतलाई चलचित्रमा कथावाचनको रुपमा प्रयोग गरिएको निर्देशक अर्जुन सुवेदीको भनाई छ । चलचित्रमा उनकै लेखन छ । दयाहाङ राई, अर्पण थापा, मिरुना मगर, प्रवीण खतिवडा, रमेश बुढाथोकीको मुख्य भूमिका चलचित्रमा रहेको छ ।
‘रङ्गेली’को कार्यकारी निर्माता जीतेन्द्र खतिवडा र अनुज जङ्ग थापा हुन् भने निर्माताहरु संसार चौलागाईं र रमेश भट्टराई वशिष्ठ हुन् । त्यस्तै, युवक कार्की र शिव शङ्कर चौलागाईँ सह-निर्मातामा छन् । विवेक खड्का (योलो) एशोसियट निर्माता रहेको चलचित्रका छायाँकार सुशन प्रजापति हुन् । चलचित्रलाई गोविन्द शाहीको काफिया फिल्मस्ले वितरण गर्दैछ ।