झरना थापा निर्देशित फिल्म ‘ए मेरो हजुर २’ को टिम अहिले मोफसल दौडाहामा छ । हेटौंडाबाट पत्रकार भेटघाट र कन्सर्टको थालनी गरेको टिमले विहीबार चितवनमा दर्शकमाँझ साक्षात्कार गर्यो । बिहान चितवनमा पत्रकार सम्मेलनको आयोजना गरेको टिमले दिउँसो चितवनका दर्शकसँग तिज सेलिव्रेशन गर्यो । ‘ए मेरो हजुर २’ सँग तिज मनाउन सयौं दर्शकको उपस्थिति थियो । दर्शकले फिल्मको टिमसँग ‘ए मेरो हजुर २’ का हिट गीत गाउँदै रमाईलो गरे । ‘ड्रिम्स’बाट युवापुस्तामाझ राम्रो क्रेज बनाएकी साम्राज्ञीलाई हेर्न सयौं दर्शकको भिडले नै फिल्मप्रति दर्शकको प्रतिक्षा व्यग्र रहेको स्पष्ट हुन्थ्यो ।
‘ए मेरो हजुर २’ टिम चितवन, बुटवल, पोखरा हुँदै राजधानी फर्किनेछ । सुहाना इन्टरटेनमेन्टको ब्यानरमा सुनीलकुमार थापाले निर्माण गरेको यो फिल्मको कथा हरिहर अधिकारीले लेखेका हुन् भने फिल्मको पटकथा सामीप्यराज तिमल्सेनाको हो । फिल्मलाई सन्जय लामाले खिचेका हुन् । फिल्म भाद्र १६ गते बाट अल नेपाल रिलिज हुदै छ ।