मनोरंजनसंसार डटकम
भाद्र २४ गते अर्थात् गत शुक्रबार देखि देशभरको हलहरुबाट एकैसाथ प्रदर्शनमा आएको दीपाश्री निरौलाको डेब्यु निर्देशन रहेको चलचित्र “छक्का पन्जा” ले मध्यम तहको व्यापार गर्न सफल रहेको छ | निकै चर्चामा रहेर सिंगल ओपेनिङ्ग पाउदा समेत चलचित्रले शुक्रबार सोचे जस्तो दर्शक पाउन सकेन | त्यसपछि शनिबार बिदाको दिन रहेर चलचित्रले राम्रो दर्शक पाउन सफल रहयो | तर आज आइतबार फेरी स्थिति सामान्यमा आइपुगेको छ | प्रदर्शन भन्दा अगाडी जुन किसिमको चर्चा परिचर्चा चलचित्रको रहेको थियो त्यो स्थरको सफलता भने चलचित्रले पाउन सकेन | राजधानीमा शनिबारको कलेक्सनको हिसाबमा राम्रो व्यापार गरे पनि पूर्वाञ्चल र पोखरा स्टेशनमा भने चलचित्रले अपेक्षित ब्यापार गर्न सकेन ।
“छ ए कान छ” र “वडा नम्बर छ” जस्तो पछिल्लो चलचित्र भन्दा पनि बढी आशा बोकेको चलचित्र “छक्का पन्जा” ले तेस्रो दिन सम्म आइपुग्दा मध्यम स्थानमा स्थिर रहेको छ | अबको अगाडिको दिन कस्तो हुनेछ भन्ने कुरा समयले बताउने छ | चलचित्रमा दिपक राज गिरी , प्रियंका कार्की , जितु नेपाल , केदार घिमिरे , बुद्धि तामाङ्ग , शिवहरि पौडेल लगाएतका कलाकारहरुको मुख्य भूमिका रहेको छ | निर्मल शर्मा चलचित्रको कार्यकारी निर्माता रहेका छन् | चलचित्रमा रोशन श्रेष्ठको द्वन्द र कविराज गहतराजको नृत्य निर्देशन समावेश रहेको छ | यो हफ्ता चलचित्रले दर्शक बटुल्न सकेन भने आउदो शुक्रबार र शनिबार चलचित्रलाई मुस्किल पर्न सक्दछ | किन भने आउदो शुक्रबार भाद्र ३१ सुरज भुसाल निर्देशित चलचित्र गाठो प्रदर्शनमा आउदै छ जसको अहिलेको युवा पुस्तामा निकै चर्चा रहेको छ |
