Fri. Jan 28th, 2022

पहिलो पटक आर्फी अफिसर्सको भूमिकामा देखिन लागेका नायक आर्यन सिग्देल अभिनित चलचित्र ‘पुनर्जन्म’ सत्य घटनामा आधारित भएर निर्माण भएको नायक आर्यन सिग्देलले सुलासा गरेका छन् । ‘सुरुमा निर्देशक सजन र निर्माता मोहनकृष्णजीले पुनर्जन्मलाई सर्ट फिल्म बनाउने भन्दै म भएको ठाँउमा आउनु भयो तर मैले कथावस्तु मन परेकाले फिचर चलचित्र बनाउँ भने अनि चलचित्र पुनर्जन्म फिचर फिल्म बनेको हो’- आर्यनले भने । आज आयोजित पत्रकार सम्मेलनमा बोल्दै आर्यनले फिल्मले नयाँ पुस्तालाई नेपालमा भएको द्वन्द्वले सैनिकको परिवारमा पारेको प्रभावलाई प्रस्तुत गर्ने बताए । अबको दश बर्ष पछाडिको पुस्ताले पनि गर्व गर्न लायकको चलचित्र पुनर्जन्म बनेको आर्यनले दाबी गरेका छन् । कार्यक्रममा बोल्दै चलचित्रका निर्देशक सजन श्रेष्ठले आर्यनको आग्रहमा नै चलचित्र सर्ट फिल्मबाट फिचर फिल्म बनेको बताए ।

timthumb

चलचित्रको कथावस्तुलाई कलात्मक साथै व्यवसायिक पनि बनाउन सकिने भएकाले फिचरमा ढालिएको निर्देशक श्रेष्ठले जानकारी दिए । दुई सिपाहीको सत्य घटनामा चलचित्र पुनर्जन्म बनेको निर्माता मोहनकृष्ण श्रेष्ठ बताए । त्यस्तै नायक गजित विष्टले सैनिकको जीवनमा द्वन्द्वले पारेको प्रभावसँगै कार्यक्षेत्रमा सैनिकको साथीभाइ प्रतिको भावना र मायाप्रेमलाई सिनेमाले समेटेको बताए भने अभिनेत्री केकी अधिकारीले सैनिक अधिकृतको जीवनमा आउने उतारचढाव र त्यसले उसको वैवाहिक जीवनमा पार्ने प्रभावलाई फिल्मले प्रस्तुत गरेको बताइन् । एमके इन्टरटेन्मेन्टको ब्यानरमा बनेको यो चलचित्रमा आर्यन सिग्देल, गजित बिष्ट, केकी अधिकारी, सुस्मिता शाही, विजय लामा, मिथिला शर्मा, लक्ष्मी गिरी, रश्मी भट्ट लगायतका कलाकारको अभिनय छ । यो चलचित्रमा मोहनकृष्ण श्रेष्ठ र भद्र बहादुर शाहीले लगानी गरेका छन् । चलचित्रमा बसन्तसँगै जयन्त शर्माको संगीत, कविराज गहतराजको नृत्य, अष्ट महर्जनको द्वन्द्व, मिलन अमात्य, अन्जु पन्त, जितु श्रेष्ठको स्वर, शिव ढकाल र नवराज कृष्ण थापाको छायांकन छ ।