काठमाडौं / ज्ञानेन्द्र देउजाद्वारा निर्देशित चलचित्र ‘उपहार’को माघे संक्रान्तिको अवसर पारेर सोमबार चारवटा पोस्टर सार्वजनिक गरिएको छ । कलाकारको चरित्र चित्रण गरिएको एउटा पोस्टरमा अभिनेत्री रेखा थापा चियावालीको रुपमा चित्रित छिन् । उनले काँधमा थर्मस भिरेकी छन् भने चियाको कप पनि बोकेकी छन् । रेखाको जोडी अभिनेता मुकुन भुषालसँग बाँधिएको छ ।
चार पोस्टरमध्ये दोस्रोमा अभिनेत्री बेनिशा हमाल वकिलको गेटअपमा प्रस्तुत छिन् भने अर्को पोस्टरमा उनी तेज गिरीसँग बेहुलीको पहिरनमा देखिएकी छन् । अभिनेत्री पूजा शर्मालाई भने चारवटै पोस्टरमा खुसी मुद्रामा देख्न सकिन्छ । चलचित्रमा उनको जोडी नव-अभिनेता समर्पण जंग कार्की हुन् । निर्मल शर्मा, राजाराम पौडेल, किरण केसी र शिशिर राणालाई पनि पोस्टरमा अटाइएको छ ।
रेखा फिल्मस् र कपनगढी सिनेमाको निर्माण रहेको चलचित्रमा सुष्मा कार्की, अंशु महर्जन र आशा भुषाल लगायतको अभिनय छ । रेखा थापा प्रस्तुतकर्ता रहेको चलचित्रमा सुलभ प्रतिक देउजा र समीक्षा देउजा निर्मातामा छन् । चलचित्रको कार्यकारी निर्माता बलराम शाही ठकुरी हुन् । यसअघि नै निर्माण टिमले चलचित्रका दुई गीत ‘वाह् वाह् वाह्’ र ‘मुटुको चार आना’ सार्वजनिक गरिसकेको छ ।
‘उपहार’मा विष्णु कल्पित घिमिरेको छायांकन, अर्जुन पोखरेल र बाबुल गिरीको संगीत, प्रमोद ढुंगाना, शंकर अधिकारी ‘घायल’ र मुक्त उदासको गीत, मित्र डि गुरुङको सम्पादन, सुलक्षण भारतीको कथा, अभिमन्यु निरवी र माधव शर्माको पटकथा तथा संवाद, अनुपम गौतमको भीएफएक्स र रोशन श्रेष्ठको द्वन्द्व रहेको छ । चलचित्रलाई रिच इन्टरटेनमेन्ट र एफडी कम्पनीले वितरण गर्दैछन् ।