काठमाडौं / नामका कारण समस्या पर्ने भन्दै सेन्सर बोर्डले अड्को थापेको चलचित्र ‘रङ्गेली’ लाई मोरङको रङ्गेली नगरपालिकाका प्रमुख दिलीप कुमार अग्रवाल (बगडिया)ले सफलताको शुभकामना दिएका छन् ।
फेसबुकमा भिडियो पोस्ट गर्दै उनले रङ्गेली नगरपालिका नामबाट चलचित्र बनेकोमा खुसी व्यक्त गरेका हुन् । भिडियो शुभकामनामा उनले ऐतिहासिक, धार्मिक तथा सांस्कृतिक दृष्टिकोणबाट अत्यन्तै महत्त्वपूर्ण तथा प्रचुर सम्भावना रहेको नेपाली चलचित्र ‘रङ्गेली’को भव्य सफलताको कामना गरेका छन् ।
चलचित्र मार्फत रङ्गेलीलाई चिनाउने काम गरेकोमा निर्माण टिमलाई धन्यवाद व्यक्त गरेका छन् । केही दिन पहिले सोही नगरपालिकाको सहमति पत्र चाहिने भन्दै केन्द्रीय सिनेमा जाँच समिति (सेन्सर बोर्ड)ले प्रमाणपत्र नदिएको खबर मिडियामा सार्वजनिक भएपछि व्यापक विरोध भएको थियो ।
विरोधपछि बोर्डले आइतबार यो चलचित्रलाई पिजी प्रमाणपत्र प्रदान गरेको थियो । अर्जुन सुवेदी ‘रङ्गेली’का लेखक तथा निर्देशक हुन् । चलचित्रमा दयाहाङको साथमा मिरुना मगर, अर्पण थापा, प्रवीण खतिवडा, रमेश बुढाथोकी, रुपेश झा, सुन्दर धिताल लगायतको प्रमुख भूमिका छ ।
यस चलचित्रका गीतहरूमा हर्क साउद, अर्जुन सुवेदी र सबिन एकतारेको शब्द रचना तथा सुशान्त गौतम र हर्कुलस बस्नेतको सङ्गीत रहेको छ । चलचित्रका कार्यकारी निर्माताहरू जीतेन्द्र खतिवडा र अनुज जङ्ग थापा हुन् ।
चलचित्रमा संसार चौलागाईं र रमेश भट्टराई वशिष्ठले निर्माण गरेका हुन् भने युवक कार्की र शिव शङ्कर चौलागाईँ सह-निर्माता हुन् । विवेक खड्का (योलो) एशोसियट निर्माता रहेको सिनेमालाई सुशन प्रजापतिले खिचेका हुन् ।