काठमाडौं / आगामी फागुन ४ गतेबाट प्रदर्शनमा आउने चलचित्र ‘जिग्री’को टिजर सार्वजनिक गरिएको छ । अभय राज बराल र आकाश मगरको मुख्य भूमिका रहेका चलचित्रको करिब १ मिनेट लामो टिजरमा दुई युवाले भोग्नु पर्ने उल्झनलाई प्रस्तुत गरिएको छ ।
चलचित्रको सार्वजनिक टिजरमा मुख्य पात्रका अलावा सुशील राज पाण्डे र पशुपति राईलाई पनि देखाइएको छ । ‘जिग्री’मा कमेडी, क्राइम र एक्सन ड्रामाको मिश्रण रहेको छ । चलचित्रलाई आकाश मगरले निर्देशन गरेका हुन । चलचित्रमा सुप्रिया राना, रोशन सुवेदी, जीवन बराल, वासुदेव खनाल, नवीन लम्साल, केदार श्रेष्ठ, दिवाकर घिमिरे र मनिष व्याञ्जु लगायतको अभिनय रहेको छ ।
चलचित्र ‘जिग्री’ वर्तमान समयको आम नेपाली युवाहरूको कथा हो । ती युवाहरूले महंगी र अभावमा पिल्सँदै काठमाडौंमा बस्नका लागि गरेको संघर्षमा निर्माण भएको छ । चलचित्रमा प्रोडक्सन डिजाइन आकी थेक्पा, संगीत सुवास पौडेल र भास्कर स्वाँर, कास्टिङ निर्देशक केदार श्रेष्ठ र भिएफएक्स लुज राज भण्डारीको रहेको छ ।
सुस्केरा आर्ट्सको प्रस्तुति तथा निर्माण र लोकल सिनेमाको सहकार्य रहेको चलचित्रका कार्यकारी निर्माता कुसुम थापा मगर र निर्माता कुमार श्रेष्ठ रहेका छन् । छायांकन सुमित भट्ट र सोमित माझी, सम्पादन र कलर सरुन मानन्धर, ध्वनि परिकल्पना र मिश्रण किशोर आचार्यको रहने चलचित्रलाई वितरण सुस्केरा आर्ट्सले गर्नेछ ।