Sat. Jan 22nd, 2022

असोज दोस्रो साता सर्ट फिल्महरूको तीनदिने फेस्टिबल हुने भएको छ । ‘एकादेशमा’ शीर्षकमा हुन लागेको फेस्टिबलमा राष्ट्रिय तथा अन्तर्राष्ट्रिय गरी २९ वटा लघु चलचित्र देखाइने आयोजकले आइतबार राजधानीमा पत्रकार सम्मेलन गरी जानकारी गराएको हो । अन्डरग्राउन्ड टकिजको आयोजनामा असोज ११ देखि १३ गतेसम्म क्युएफएक्स कुमारी हलमा हुने भएको छ । महोत्सवको पहिलो दिन नेपाली लघु चलचित्र ‘द कन्टाजियस अपारिसन्स अफ डम्बरे डेन्ड्राइट’ प्रदर्शन गरिने जनाइएको छ । फेस्टिवलको समापन सर्वनाम थिएटरमा गरिने कार्यक्रमका निर्देशक सोहम ढकालले बताए । ‘कथाको धागोहरू’ मूल नारा बोकेको फेस्टिबल फूलको माला, हीराको माला र सुनको माला तीन खण्डमा हुने आयोजकले जनाएको छ । जसमा फूलको मालाअन्तर्गत कथावाचनको पुरातन शैलीलाई तोड्दै दर्शकले चाहेको विभिन्न रंगका कथा फरक ढंगले प्रस्तुत गरिएका देश÷विदेशका उत्कृष्ट १२ चलचित्र प्रदर्शन गरिनेछ भने हीराको माला खण्डमा विश्वका २५० भन्दा बढी सहरमा एकै सातामा प्रदर्शन हुने विभिन्न देशका उत्कृष्ट १० लघुचलचित्र प्रदर्शन गरिने आयोजकले जनाएको छ । त्यस्तै, सुनको माला खण्डमा नेपाली चलचित्रको भविष्य, नवोदित चलचित्रकर्मीलाई प्रोत्साहनस्वरूप चलचित्र अध्ययन गर्ने विद्यार्थीका उत्कृष्ट ८ चलचित्र प्रदर्शन गरिने भएको छ । फेस्टिबलमा उत्कृष्ट हुने चलचित्रलाई ३० हजार र विद्यार्थीका चलचित्रलाई २० हजार रूपैयाँ पुरस्कार प्रदान गरिने जनाइएको छ । उत्कृष्ट चलचित्रको छनोट अडियन्सले गर्ने फेस्टिवल निर्देशक ढकालले बताए ।