प्रदीपको रोजीकाे गीत रिलिज

काठमाडाैं ।
युवा स्टार प्रदीप खड्का अभिनीत फिल्म ‘रोजी’ को अफिसियल गीत सार्वजनिक भएको छ । ‘फूल हैन…’ बोलको गीतमा प्रताप दास र प्रविशा अधिकारीको स्वर छ ।
राजेश कुमार श्रेष्ठको शब्द रहेको गीतमा प्रदीपका फेभरेट संगीतकार एलिस कार्कीले संगीत भरेका छन् । गीतको भिडियोमा प्रदीप र अभिनेत्री मिरुना मगर फिचर्ड छन् । यसमा दुवैको केमेस्ट्री मिलेको छ।
टर्कीका पर्यटकीय थलो इस्तानबुल, साल्टलेक र कोनियामा दृश्यांकन गरिएको गीतको भिडियोमा प्रदीपको गेटअप फरक देख्न सकिन्छ । उनको पोशाकले फिल्मप्रति कौतुहलता जगाउनेमा शंका छैन । कविराज गहतराजको नृत्य निर्देशन रहेको गीतको लोकेशन र छायांकन पक्ष सुन्दर छ ।
प्रदीप ज्वाइन भएसँगै यस फिल्मका हरेक गतिविधिमा दर्शकको चासो थियो । ‘प्रेमगीत’ का सिरिज र ‘लिलिबिली’ को सफलतापछि उनको क्रेज निकै बढेको छ । यसलाई क्याच गर्न उनलाई लिएर फिल्म बनाउने निर्माता/निर्देशकको ठूलै भिड छ ।
महँगो पारिश्रमिक लिएर ‘रोजी’ मा अनुबन्ध भएका प्रदीपले यसमा क्रिमिनलको भूमिका निर्वाहा गरेका छन् । यसअघि सार्वजनिक भएको फिल्मको टिजरले पनि यो कुरालाई थप छर्लङ्ग पार्छ । अभिनेत्री परमिता आरएल राणाले उनको प्रेमिकाको भूमिका निर्वाहा गरेकी छन् ।
गोपीकृष्ण मुभिज र आरोही इन्टरटेन्मेन्टको ब्यानरमा निर्मित यस फिल्ममा कर्मा शाक्य, बरुण आरएल राणा, रविन्द्र खड्का, प्रकाश श्रेष्ठ, पल्पसा डंगोललगायतका कलाकारहरुको अभिनय छ । उद्धव पौडेल यसका प्रस्तुतकर्ता हुन् ।
आयरा पौडेल र आरोही केसीको निर्माण रहेको ‘रोजी’ लाई राजु विक्रम थापाले खिचेका हुन् । केदार भुषालको कथामा तयार भएको फिल्मको सम्पादनको जिम्मेवारी मित्र डि गुरुङले सम्हालेका छन् । सो फिल्मका निर्देशक निरक पौडेल हुन् ।
अर्जुन पोखरेलको संगीत रहेको ‘रोजी’ मा कबिराज गहतराज र रिशब टोट्लानीको कोरियोग्राफी छ । छायांकन सकिएको छोटो समयमा नै प्रदर्शन मिति तय गरेर दर्शक भेट्न लागेको यस फिल्मको ‘रामकहानी’ सँग लरतरो भिडन्त भने हुने छैन ।
नामका कारण पनि लामो समयदेखि विवादमा फसेको ‘रोजी’ रोजी महर्जनको हत्या प्रकरणमा आधारित रहेको चर्चा छ । तर निर्माण टिमले यो कुरा नकार्दै आइरहेको छ । रोजीका परिवारको दबाबमा गएको केही महिना अगाडि फिल्मको छायांकन समेत रोकिएको थियो ।