बिलबोर्ड म्युजिक अवार्डमा एड सिरन पाँच विधामा उत्कृष्ट

काठमाडाैं । 
यस पालिको बिलबोर्ड म्युजिक अवार्डमा गायक एड सिरनले सर्वाधिक पाँच उत्कृष्ट घाेषित भएका  छन् ।
टप आर्टिस्ट अफ द इयरदेखि टप सङ सेल्स, टप रेडियो सङ आर्टिस्टसम्मका महत्त्वपूर्ण मानिने विधामा उनले ट्रफी जिते । बिलबोर्डकाे आधारमा उनी यस वर्षको नम्बर वान गायक बन्न सफल भएका छन् । आइतबार अमेरिकामा सम्पन्न अवार्ड वितरण समारोहमा र्‍यापर केन्ड्रिक लमार एडपछिका ‘बिग विनर’ घोषित भए ।
एड र केन्ड्रिकसँगै गायक ब्रुनो मार्स सर्वाधिक १५ विधामा मनोनयमा परेका थिए । केन्ड्रिकले ‘हम्बल…’ गीतका लागि टप र्‍याप आर्टिस्ट, टप स्ट्रिमिङ सङ (अडियो) लगायत चार विधामा अवार्ड जिते । ब्रुनोले चाहिँ आर एन्ड बी विधाका सम्पूर्ण प्रमुख अवार्ड हात पारेका थिए । गत साल सबैभन्दा बढी ट्रफी जित्ने ब्रुनो यसपालि तेस्रो ठूलो विजेता बन्न पुगे ।
अधिकांश विधामा पुरुष आर्टिस्ट मनोनीत भएको भन्दै यसपालि बिलबोर्ड अवार्डको खिसी गरिएको थियो । मनोनयनमै पुरुष भएपछि तिनले नै ट्रफी जित्ने भए । कतिपय संगीत समीक्षकले अवार्डलाई पुरुषप्रधान भनेका छन् । यद्यपि, बिलबोर्डको इतिहासमा पहिलो पटक अफ्रिकी मूलकी अमेरिकी गायिका (ज्यानेट ज्याक्सन) लाई बीबीएमए आइकन अवार्ड प्रदान गरियो । समारोहमा पुरुषको वर्चस्व नदेखिओस् भनेर आयोजकले पर्याप्त महिला आर्टिस्टका प्रस्तुति राखेको थियो ।
केही समयको ग्यापपछि गायनमा फर्किएकी टेलर स्विफ्टले टप फिमेल आर्टिस्टको अवार्ड जितिन् भने कार्डी बीलाई टप फिमेल र्‍यापर घोषित गरियो । सिजाले टप आर एन्ड बी फिमेल आर्टिस्टको ट्रफी पाइरहँदा टप कन्ट्री फिमेल आर्टिस्ट विधामा म्यारेन मरिसको नाम उद्घोष गरियो । ‘हभाना…’ गायिका कमिला कबेलोलाई बिलबोर्ड चार्ट अचिभमेन्ट अवार्ड दिइयो । खालिदलाई उत्कृष्ट नवकलाकार मानिरहँदा ‘इम्याजिन ड्रयागन्स’ ब्यान्डले समूह गायन र रक आर्टिस्ट विधामा अवार्ड जितेको थियो ।
युटयुबमा भाइरल भएको ‘डिस्पासितो…’ गीतले लुइस फोन्सि, डयाडी यांकी र जस्टिन बिबरलाई बिलबोर्डको स्टेजमा निम्त्यायो । टप ल्याटिन सङसहित अन्य थुप्रै विधामा गीत अब्बल मानियो । विश्व संगीतको सबैभन्दा ठूलो अवार्ड समारोहमा कोरियन ब्वाई ब्यान्ड बीटीएसले ‘टप सोसियल आर्टिस्ट’ को ट्रफी जितेको थियो । बीटीएस बिलबोर्डमा प्रस्तुति दिने पहिलो के–पप ब्यान्ड पनि बन्न सफल भयो ।