श्रृष्टीको नजरमा परे सौगात

नेपाली चलचित्र क्षेत्रमा उदाउँदै गरेकी ‘पूर्व मिस नेपाल’ श्रृष्टी श्रेष्ठको नजरमा नायक सौगात मल्ल उत्कृष्ट कलाकार हुन् । सौगातसँग काम गर्न व्यग्र प्रतिक्षा गरेकी यी सुन्दरीले उनको कथामा भिज्ने शैलीलाई मन पराइन् ।
अनलाइनखबरसँग कुरा गर्दै श्रृष्टीले भनिन्-‘सौगात मल्ल बलियो पात्र हुन् । हरेक चरित्रलाई न्याय दिन सक्नु उनको खुबी हो । म उनको फ्यान हुँ ।’ श्रृष्टीका अनुसार ‘कथा’ नामक चलचित्र हेरेपछि उनी सौगातको फ्यान भएकी हुन् । यतिमात्र होइन, श्रृष्टीको नजरमा सौगात वास्तविक कलाकार हुन् । अहिलेसम्म सौगातसँग म्यूजिक भिडियोदेखि चलचित्रमा श्रृष्टीले काम गर्ने अवसर पाएकी छैनन् । तर, प्रतिक्षा गरिरहेकी छिन् ।
नायिकाको हकमा भने उनलाई ऋचा शर्मा मनपर्छ । ऋचा पनि आफ्नो पात्र भित्र भिज्ने खुबी राख्छिन् । उनको नजरमा ऋचा नायिका भन्दा पनि भूमिकामा भिज्ने पात्र हुन्, जुन उनलाई सर्वाधिक मन परेको छ । श्रृष्टी पनि आफू नायिका भन्दा कलाकार बन्न चाहेको बताउँछिन् ।
श्रृष्टी अभिनित चलचित्र ‘गाजलु’ जेठ २८ गते अल नेपाल रिलिज हुँदैछ । यो चलचित्रबाट उनले चलचित्र क्षेत्रको ढोका खोल्ने आश गरेकी छिन् ।