नेपालमा सबै भन्दा ठुलो बजेटको फिल्म निर्माण हुदै , फिल्मको यात्रा नेपाल टु अमेरिका

चलचित्र लभ लभ लभ पछि दोस्रो फिल्मको निर्माणको तयारीमा रहेकी निर्मात्री शर्मिला पाण्डेले शुक्रबार प्रेस मिट गर्दै दोस्रो फिल्म निर्माणको घोषणा गरिन
फिल्म ‘लभ लभ लभ’ले दर्शक र समिक्षकहरुबाट उत्कृष्ट प्रतिक्रिया पाएका कारण दोस्रो फिल्म निर्माण गर्न लागेको निर्मात्री शर्मिला पाण्डेलले जानकारी दिइन् । लाखौ रुपैयाँ खर्च गरेर मेक्सिकोको बाटो हुँदै हरेक दिनजसो नेपालीहरू गैरकानुनी रूपमा अमेरिका छिर्ने गर्छन् । जंगल, समुद्र र जेल हुँदै अमेरिकासम्मको यात्रा तय गर्ने क्रममा कतिपय नेपाली जंगली जनावरको सिकार पनि हुन्छन् । कतिपय समुद्रमा डुंगा डुबेर गोही र सार्कको सिकार हुन्छन् । कतिपय अमेरिका आउनुअगाडि नै अन्य देशमा पक्राउ परेर उतैबाट फर्काइन्छन् । यति धेरै जोखिमबीच पनि मेक्सिको हुँदै नेपालीहरू गैरकानुनी रूपमा अमेरिका छिर्ने क्रम घट्दो छैन, बरु बढ्दो छ । यही विषयवस्तुमा आधारित भएर ५ करोडको लागतमा नेपाली फिल्म निर्माण हुने भएको छ । ‘पशुपति प्रसाद’, ‘लभ लभ लभ’ निर्देशक दीपेन्द्र के. खनालको निर्देशनमा बन्ने अनटाइटल प्रोजेक्टको शुक्रवार राजधानीमा एक कार्यक्रमका बीच घोषणा गरियो । ‘लभ लभ लभ’ फिल्मका प्रस्तुतकर्ता अमृत पाण्डे र निर्मात्री शर्मिला पाण्डेको लगानीमा बन्ने यो फिल्मको नाम चाँडै घोषणा गर्ने निर्देशक खनालले जानकारी दिए ।
फिल्मको लिड रोलमा लेखक तथा कलाकार खगेन्द्र लामिछाने मात्र फाइनल भएका छन् भने बाँकी अरु दुई मुख्य कलाकारहरु भने छनौट हुन बाँकी छ । ‘लभ लभ लभ’ मा मुख्य भूमिकामा निर्वाहा गरेको आफ्नो छोरा सुरज पाण्डे यो फिल्ममा नहुने निर्मात्री शर्मिला पाण्डेलले जानकारी दिइन् ।उनका अनुसार, यो फिल्मपछि बन्ने तेस्रो प्रोजेक्टमा भने सुरज लिड रोलमा रहनेछन् । अनटाइटल यो फिल्ममा सुरज पाण्डे प्रोडक्म्सन हेडको रुपमा रहेका छन् । मंसीर १५ बाट फिल्मको सुट सुरु हुनेछ ।फिल्मको छायांकन नेपाल हुँदै भएर इन्डिया, थाईल्यान्ड, ब्राजिल, कोलम्बिया, मेक्सिको हुँदै अमेरिकाको टेक्साससम्म हुने निर्देशक खनालले कार्यक्रममा बताए । सुरज सिने आट्स र दीपेन्द्र के. खनाल प्रोडक्शनबाट निर्माण हुने यो फिल्मको कथा निर्देशक खनाल आफैले तयार पारेका हुन् ।