चलचित्र सम्पादन क्षेत्रमा आफुलाई राम्रो परिचय बनाउन सफल सुरेन्द्र पौडेलले निर्देशन गरेको चलचित्र आभाष पुष २५ गते नेपालका ६५ वटा हलमा चल्ने भएको छ । आज राजधानीमा पत्रकार सम्मेलनको आयोजना गरि चलचित्र नेपालका ६५ वटा हलहरुमा प्रदर्शन हुने चलचित्रका निर्माता गोविन्द शाहीले जानकारी दिएका छन् । कार्यक्रममा बोल्दै चलचित्रका निर्माता गोविन्द शाहीले चलचित्रलाई अन्तरराष्ट्रिय कलाकार समाजले विभिन्न ४० वटा भन्दा बढी देशमा देखाउने भएको पनि बताएका छन् । त्यसबाट करिब चलचित्रलाई २५ लाख रुपैयाँ नाफा हुने जानकारी दिदैं निर्माता शाहीले यति बेला दर्शकको रोजाईमा चलचित्र आभाष परेको पनि बताए । त्यस्तै कार्यक्रममा बोल्दै चलचित्रका निर्देशक सुरेन्द्र पौडेलले अहिलेको युवापुस्तालाई मनछुने गरि आफुले चलचित्र निर्देशन गरेका कारण युवापुस्ताले मात्र होइन जुन सुकै बर्गका दर्शकहरुले पनि चलचित्र हेर्न सक्ने निर्देशक पौडेलले बताए । कार्यक्रममा कलाकार आष्मा डिसी,सलोन बस्नेतको उपस्थिति भएका थिए भने संयम अर्को नयाँ चलचित्रको शिलशिलामा काठमाडौं भन्दा बाहिर रहेका छन् ।
कार्यक्रममा चलचित्रकी नायिका आष्मा डिसीले चलचित्रमा आफुले गरेको अभिनय भन्दा पनि सलोन र संयमले गरेको अभिनयले सबैको मनछुन सफल हुने बताइन । चलचित्रमा संयम र सलोनले निकै मेहेनत गरेको खुलाउदैं आष्माले सलोन र संयमको अभिनयको मापन गर्न पनि भ्याएकी थिइन । उनले संयमलाई १० र सलोनलाई ९.५ दिएकी छिन् । त्यस्तै कलाकार सलोन बस्नेतले चलचित्र आभाषले सबैलाई मनको आभाष गराउने दाबी गरे । चलचित्र राम्रो बनेका कारण दर्शकले चलचित्रलाई मनपराउने पनि सलोनले बताएका छन् । चलचित्रमा सुनिल रावल, संयम पुरी, होष्टेलबाट परिचित कलाकार सलोन बस्नेत, आष्मा डिसी,निशा अधिकारी,प्रकृति श्रेष्ठ लगायतले अभिनय गरेका छन् । क्रियटिभ फिल्म एण्ड ग्लोसी पिक्चर्सको प्रस्तुतिमा निर्माण भएको चलचित्र ‘आभाष’ लाई युवा निर्देशक सुरेन्द्र पौडेलले निर्देशन गरेका हुन् । पवन श्रेष्ठ,गोविन्द शाही र दिपक शाहीको लगानीमा निर्माण भएको चलचित्र आभाषले प्रेममा हुने विछोड र आकर्षणलाई पर्दामा उतारेको छ ।
